Një ngjarje e rëndë ndodhi ditën e djeshme në Golem, ku një punëtor ra nga objekti ku po punonte, duke gjetur vdekjen.
Në lidhje me këtë ngjarje, policia ka arrestuar shtetasin, M.K., i cili kishte marrë përsipër kryerjen e punimeve.
Gjithashtu janë shpallur në kërkim drejtuesja teknike dhe administrator.
Nga verifikimet rezultoi se punëtori ishte i pasiguruar dhe nuk kishte kontratë pune.
Materialet proceduriale i kaluan Prokurorisë së Kavajës për veprime të mëtejshme.
NJOFTIMI I PLOTË
Arrestohet përfaqësuesi i firmës që kryente punimet dhe shpallen në kërkim policor administratori dhe drejtuesja teknike, në lidhje me ngjarjen e ndodhur ditën e djeshme në Golem, ku në një objekt ndërtimi u rrëzua nga lartësia dhe më pas ndërroi jetë në spital punëtori D. H.
Shërbimet e Komisariatit të Policisë Kavajë, nën drejtimin e Prokurorisë pranë Gjykatës së Shkallës së Parë Kavajë bënë arrestimin e shtetasit: M. K., 37 vjeç, banues në Durrës.
Ky shtetas, me detyrë përfaqësues i firmës që kishte marrë përsipër kryerjen e punimeve në objektin e ndërtimit në Golem ka shkelur rregullat e mbrojtes në punë, pasi nga verifikimet e kryera ka rezultuar se punëtori D. H. (i cili ra nga lartësia dhe më pas ndërroi jetë në spital) nuk ka qënë i siguruar dhe nuk ka patur kontratë pune me firmën e punimeve që shtetasi M. K. përfaqësonte.
Gjithashtu janë shpallur në kërkim policor administratori dhe drejtuesja teknike e firmës që kryente punimet, shtetasit I. K. dhe E. S., pasi nuk kishin marrë masa për zbatimin e rregullave të mbrojtjes në punë.
Materialet procedurale iu referuan për veprime të mëtejshme Prokurorisë pranë Gjykatës së Shkallës së Parë Kavajë, për veprat penale “Shkelja e rregullave të mbrojtjes në punë” dhe “Punësim i paligjshëm”.
Kujtojmë këtu se pak kohë më parë në Tiranë, gjatë rikonstruksionit të një pallati, si pasojë e shembjes së skelës, humbën jetën dy punëtorë dhe u plagosën tre të tjerë.
