Gjykata e Beratit, ka lënë edhe për 20 ditë të tjera me masën e sigurisë ‘arrest me burg’, inxhinierin e pyjeve në Berat, Karafil Bregu. Ky i fundit u arrestua në 28 gusht, një ditë pas rënies nga pema të punonjësit të bashkisë Berat, Shkëlqim Metkaj, që solli për fat të keq edhe vdekjen e tij.
Inxhinieri Karafil Bregu, akuzohet nga Prokuroria për ‘Shkelje të rregullave të sigurisë gjatë punës’, dhe se nuk ka marrë masat e mbrojtjes në punë, si dhe nuk ka qenë prezent në momentin e rrëzimit.
Gjyqtarja Klejda Çapja, ka vendosur ta shtyjë edhe 20-ditë masës e sigurisë “arrest në burg” për Bregun, deri në plotësimin e të gjitha veprimeve hetimore për inxhinierin e pyjeve në Bashkinë Berat. Edhe në këtë seancë të dytë të masës së sigurisë për Bregun, avokati i tij mbrojtës ka kërkuar caktimin e një mase më lehtësuese.
Ai e ka argumentuar kërkesën e tij për ndryshimin e masës së sigurisë me pretendimin se Bregu është arrestuar në mënyrë të paligjshme. Sipas avokatit mbrojtës, Bregu nuk ka qenë në punë ditën që ndodhi ngjarja e rëndë por ka qenë i karantinuar në banesën e tij në lagjen “Uznovë”, për shkak se kishte shfaqur shenja të Covid-19 dhe ishte në pritje të përgjigjes së tamponit të bërë.
Në gjithë këtë histori, si gjithmonë, e pësojnë vetëm punëtorët e Bashkisë. Asnjë reagim nuk ka patur nga kryetari i bashkisë Berat, Ervin Demo. Po ai, mban përgjegjësi për faktin që punonjësit e tij janë në orarin e punës pa mjetet mbrotjëse?
Ngjarja e rëndë për të cilën akuzohet inxhinieri i pyjeve Karafil Bregu ndodhi në 27 Gusht 2020 në vendin e quajtur “Ura e Goricës” në Berat. Punonjësi i Drejtorisë të Bujqësisë në bashkinë Berat, Shkëlqim Metkaj ishte duke prerë një lis shekullor, degët e të cilit po binin në rrugë, duke u shndërruar në rrezik për kalimtarët dhe automjetet. 46-vjeçari Metkaj, babai i dy fëmijëve, ra nga pema dhe gjeti vdekjen e menjëhershme.
/GazetaReforma.com/
