Në kuadër të mbështjes sociale nga ana e shtetit, ministrja e Ekonomisë Delina Ibrahimaj ka bërë të ditur vendimin që është marrë ditën e sotme. Ibrahimaj njofton se të gjithë bizneset që kanë një numër të konsiderueshëm punonjësish do të duhet të punësojnë edhe persona me aftësi të kufizuar. Ministrja deklaroi se tashmë personat me aftësi të kufizuara do të punojnë në biznese të ndryshme, vendim i cili do të ndikojë në nxitjen e punësimit.
“Ligji për nxitjen e punësimit do të jetë një vendosje barazie për çështjet sociale. Miratuam një ndryshim një ligjin për nxitjen e punësimit, vendosjen e barazisë për çështjet sociale. Lidhet me fondin social të punësimit, të gjithë bizneset me numër të lartë të punësuarish duhet me detyrim të punësojmë persona me aftësi të kufizuar. Do japim një procedurë, që do jetë aktive që nga janari 2024. Do i japim kohë administratës tatimore qoftë bizneseve që zbatimin e këtij ligji. Do duhet të punësojnë persona me aftësi të kufizuar, ose të paguajnë me kontribute sa paga minimale për çdo person që nuk marrin në punë persona me aftësi të kufizuar”, tha ministrja.
Ndërkohë për sa i përket taksës së jashtëzakonshme ministrja u shpreh se do të shpërndahet për personat e kategorisë së nevojshme. “Kemi deklaruar se taksa e jashtëzakonshme do të mblidhet dhe do të shpërndahet për kategoritë që kanë nevojë dhe pensionistët”, u shpreh Ibrahimaj.
