Leja speciale për ballkanasit që kërkojnë të punojnë në Gjermani skadon në janar të vitit 2021, por në Parlament po përgatiten ndryshime.
Ministria gjermane e Punës ka paraqitur një projektligj ku parashikohet që Rregullorja për Ballkanin Perëndimor të zgjatet deri në vitin 2023. Kjo do të thotë se qytetarët e Shqipërisë, të Bosnje-Hercegovinës, të Maqedonisë së Veriut, Malit të Zi, të Serbisë dhe të Kosovës kanë të drejtë të shkojnë në Gjermani pavarësisht kualifikimit formal për punësim. Të interesuarit mund marrin vizë pune në Gjermani edhe pa njohuri të gjermanishtes dhe pa kualifikim profesional, por kushti i vetëm është që aplikanti të paraqesë kontratën e punës dhe miratimin nga Agjenca Federale e Punësimit.
Çdo vit nga ky ligj përfitojnë deri në 25,000 vetë.
Sipas një studimi të Institutit për Tregun e Punës dhe Kërkimit Profesional (IAB), raporton DW, 58 përqind e fuqisë punëtore nga Ballkani Perëndimor janë punësuar si specialistë ose ekspertë, kryesisht në industrinë e ndërtimit.
