Gripi i pulave po përhapet masivisht në vendin tonë, ku pothuajse çdo ditë zgjerohet harta.
Pavarësisht situatës së krijuar nga gripi i shpendëve në disa zona të vendit, fermerët vazhdojnë të tregtojnë pulat në treg pa certifikatë. Ndërkohë që Ermira Gjeci,zv.ministrja e Bujqësisë ka ndjekur “ritin” për të qetësuar konsumatorët duke iu thënë se nuk paraqitet asnjë rrezik nga gripi dhe se situata është nën kontroll.
Zëvendësministrja e Bujqësisë Ermira Gjeci, ka bërë raportimin e përditshëm mbi situatën e gripit të shpendëve, ku gjatë orëve të fundit janë zbuluar dy vatra të reja në Divjakë dhe në Devoll.
“Aktualisht kemi një vatër të re në Divjakë dhe në Devoll, po shtohen masat për mbajtjen nën kotroll të situatës. Po kryhet tamponimi sipas rrezes që është vendosur, dhe po bëhet shuarja e vatrave”, tha Gjeci, e sila siguroi konsumatorët se produktet që shiten në treg, janë të pakontaminuara dhe mund të konsumohen pa problem.
“AKU ka kryer kontrolle në të gjithë territorin, deri tani nuk janë evidentuar shkelje, policia e shtetit është në bashkëpunim. Sigurojmë konsumatorët që nuk ka asnjë problem për mishin dhe vezët, që duhet ti gatuani me temperaturë më të lartë se 70 grade celsius”, u shpreh zëvendësministrja, e cila u pyet nga gazetarët dhe në lidhje me faktin se kush do ti mbulojë kostot e groposjes së shpendëve.
