Dy ditët e fundit Shqipëria ka kaluar një situatë paniku, si pasojë e tërmeteve të njëpasnjëshme.
Më i forti u regjistrua të shtunën rreth orës 16:00, me magnitudë 5.8 ballë.
Ndërkohë gjatë orëve në vijim pati disa lëkundje të vogla, deri te lëkundja 4.5 ballë e mbrëmjes së djeshme që u digjua në Tiranë dhe në Durrës.
Sikur të mos mjaftonte kjo, në portalin e lajmeve “Syri.net” dhe “Shekulli”, u publikua një lajm, i cil fliste për një sizmolog grek, që kishte parashikuar një tërmet 6 ballë rreth orës 11:30.
Kaq mjaftoi dhe rrugët e kryeqytetit, por edhe të Durrësit, u mbushën plot me njerëz, që i kishte pushtuar frika.
Vetëm pak minuta më vonë, autoritetet shtetërore sqaruan se bëhej fjalë për një lajm të rremë.
Menjëherë Policia e Tiranës, shoqëroi në polici gazetarin e “Syri.net”, Aurel Rakipllari dhe gazetaren e “Shekullit”, Daniela Grica.
Gjithashtu Policia e Shtetit u ka bërë thirrje qytetarëve të ruajnë qetësinë, ndërsa ka kërkuar nga mediat, që të jenë më të kujdesshme në publikimin e lajmeve.
Njoftimi i policisë
Policia e Shtetit
Menjëherë pas publikimit të një lajmi të rremë në portalin “SYRI.net” dhe më pas edhe në disa portale të tjera, se sipas parashikimeve të një sizmologu grek do ketë në orën 23.30 një tërmet të fuqishëm, lajm i cili shkaktoi panik të madh tek qytetarët të cilët braktisën banesat dhe dolën në rrugë, Shërbimet e Drejtorisë Vendore të Policisë Tiranë kanë shoqëruar në Polici gazetarin e portalit “SYRI.net“, Aurel Rakipllari dhe gazetaren Daniela Grica e “Shekullit”, për veprime të mëtejshme, të cilët kanë bërë publikimin e këtij lajmi të rremë, me pasoja paniku te qytetarët.
Policia e Shtetit ka ngritur një grup të posaçëm hetimor për të bërë të mundur zbardhjen e plotë të autorësisë së këtij lajmi dashakeq që krijojë frikë e panik tek qytetarët.
Policia e Shtetit ju bën thirrje qytetarëve që të ruajnë qetësinë dhe të mos bien pre e njoftimeve dashakeqe dhe siguron ata se cilido që do përhapë njoftime të tilla do të përballet me forcën e ligjit.
Policia e Shtetit kërkon mirëkuptimin e medias që të tregohen më të kujdesshëm në njoftimet që shpërndajnë, duke kërkuar informacion zyrtar para publikimeve të lajme që krijojnë frikë e panik tek qytetarët.
