Kanë kaluar rreth 3 muaj që nga shpërthimi i Coronavirusit, i cili fillimisht preku Kinën e më pas u përhap në të gjitha kontinentet.
Deri tani janë prekur të paktën 125 shtete, ku janë regjistruar 130,342 të infektuar dhe 4,757 viktima.
Nga këto, 80 mijë persona të infektuar dhe 3,169 vdekje janë shënuar brenda territorit të Kinës, e cila javët e fundit duket se po përmirësohet dita-ditës.
Italia tashmë është në një situatë shumë kritike, pasi kurba e të infektuarve e viktimave vijon të rritet dhe në një periudhë kohore të shkurtër janë shënuar 12,893 të prekur dhe 1,016 viktima.
Pas saj, renditen Irani, Koreja e Jugut, Spanja, Gjermania, Franca, SHBA etj., teksa këto ditë priten të jenë vendimtare ku sipas ekspertëve kurba do arrijë kulmin e më pas do pësoj një rënie duke shkuar drejt normalizimit.
Sipas statistikave të fundit, rezulton se nga totali i të prekurve, 68, 672 persona janë shëruar plotësisht ndërsa 56, 434 raste janë akoma aktive.
Nga personat që janë aktiv momentalisht 5, 711 janë në gjendje kritike.
Deri tani shkencëtarë nga e gjithë bota kanë bërë përpjekje për të krijuar vaksinën që do sjellte mposhtjen përfundimtare të COVID-19, por nuk kanë arritur ende në një rezultat pozitiv.
Madje, sipas tyre edhe nëse do krijohej vaksina nuk do mund të dilte në treg para 2021.
Në vendin tonë deri tani janë shënuar 23 të infektuar dhe 1 viktimë, teksa janë marrë masa të shumta nga qeveria.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
