Rezultatet e analizave të kryera te dhjetra fëmijë të Kopështit Publik Nr.1 në Gramsh, të cilët u paraqitën këtë javë në spital me simptoma të rënda helmimi, kanë konfirmuar se pesë prej tyre janë infektuar me salmonelë.
Gazetari Osman Stafa raportoi nga Gramshi se nga 80 mostra të marra dhe analizuar në Institutin e Shëndetit Publik, 5 kanë rezultuar pozitive për salmonelë.
Mjekja mikrobiologe e njësisë vendore të Kujdesit Shëndetësor, Dafina Shtylla, konfirmoi se gjendja e fëmijëve është nën kontroll, ndërsa apeloi që prindërit të shmangin kurimin në shtëpi dhe të drejtohen menjëherë në spital për ndihmë të specializuar në rast të përkeqësimit të gjendjes.
“Salmonela është një sëmundje bakteriale që zakonisht transmetohet përmes duarve të palara dhe ushqimit të kontaminuar. Ekspertët po vazhdojnë hetimet epidemiologjike për të identifikuar burimin e infektimit,” tha mjekja.
Prokuroria e Elbasanit ka nisur menjëherë hetimet, duke bllokuar kartelat mjekësore të fëmijëve të prekur dhe ushqimet në kuzhinën e kopështit.
Hetimet po fokusohen tek kompania “Nelsa shpk”, e cila është furnizuesi kryesor i ushqimit për këtë kopësht, si dhe për spitale dhe institucione të tjera në zonë, dhe që ka fituar disa tendera në këtë sektor.
Në shenjë revolte ndaj situatës, prindërit kanë paralajmëruar protestë ditën e hënë, me qëllim kërkimin e përgjegjësisë ligjore për autorët dhe institucionet përgjegjëse.
