Policia e Shtetit ka bërë publike listën e kandidatëve që janë në garë për pozicionet e Shefave të Komisariateve, me gjithsej 290 aplikime për drejtimin e komisariateve në të gjithë vendin.
Ky proces përfshin gjithashtu gra, dhe do të mbetet për t’u parë nëse ndonjë nga 48 komisariatet do të drejtohet nga një shefe e re.
Në garë janë edhe shefat aktualë të komisariateve, të cilët kanë aplikuar për të ruajtur pozitat e tyre. Komisioni i përzgjedhjes së kandidatëve përbëhet nga tre anëtarë: një përfaqësues i Ministrisë së Brendshme, një nga Policia e Shtetit dhe një nga Akademia e Sigurisë.
Kandidatët duhet të plotësojnë disa kritere të përcaktuara, përfshirë mbajtjen e një grade drejtuesi të rolit të parë, të mos kenë shkelje të rënda disiplinore dhe të mos kenë konflikt interesi. Komisioni ka një afat prej 10 ditësh për të përfunduar vlerësimin dhe verifikimin e aplikimeve, si dhe për të siguruar që kandidatët përmbushin kushtet ligjore.
Komisioni do të kryejë vlerësimin paraprak të aplikimeve, me qëllim verifikimin e plotësimit të kushteve ligjore nga kandidatët të cilët kanë shprehur interes për pozicionin “Shef Komisariati””, thuhet në njoftimin e policisë.
