Skandali i pagave në Shqipëri ka qenë në vëmendjen e mediave gjermane dhe austriake, duke nisur nga gazeta ‘Frankfurter Allgemeiner Zeitung’ e deri te agjencia ‘APA’, të cilat raportojnë për një rrjedhje masive të të dhënave në Shqipëri.
Edhe gazeta të tjera të botës, si austriakja ‘Der Standard’, theksojnë se viktima të këtij skandali kanë rënë edhe vetë presidenti, kreu i qeverisë dhe anëtarët e shërbimit sekret.
“Të dhënat përfshijnë kartën e identitetit, punëdhënësin, rrogat mujore dhe numrat e telefonit. Ato janë shpërndarë në platformat sociale. Mediat shqiptare përllogarisin se 700 mijë persona janë prekur nga kjo rrjedhje të dhënash. Këtu përfshihen punonjës bankash, sipërmarrës, nëpunës civilë, punonjës të shërbimeve sekrete dhe të ushtrisë, si dhe gazetarë”.
Më tej thuhet se autoritetet hetimore kanë konfiskuar disa servera, por ajo që theksojnë të gjithë mediat është se kjo është hera e dytë brenda vitit që ndodh një skandal i këtyre përmasave, por pa mbajtur kush përgjegjësi.
“Kjo është rrjedhja e dytë e madhe e të dhënave në Shqipëri brenda një viti. Të dhënat e pothuajse një milion shqiptarëve rrodhën në media në prill përpara zgjedhjeve parlamentare. Deri më tani askush nuk ka mbajtur përgjegjësi për këtë rast”, shkruan FAZ.
Kujtojmë se dy ditë më parë u bënë publike të dhënat e pagave, të cilat përkonin ato të muajit janar 2021, ndërsa ditën e djeshme u publikuan të tjera të dhëna, të cilat i takonin muajit prill. Po ashtu, në rrjetin ‘whatsapp’ qarkullon dhe lista me numrat e telefonave. Kryeministri Edi Rama në një deklaratë për mediat tha se të dhënat kanë rrjedhur nga individë të brendshëm dhe nuk kemi të bëjmë me një sulm kibernetik. Ai shtoi më tej se të gjithë inspektorët e tatimeve, por jo vetëm, të vendosen në hetim dhe të gjenden përgjegjësit sa më shpejtë./FAZ
