Autoriteti i Konkurrencës duket se po mbyll sytë përball një tjetër shkelje abuzive si është ajo e rritjes së çmimeve të karburanteve. Ditën e sotme me një njoftim zyrtar konfindustria i bëri thirrje politikës, Kuvendit dhe qeverisë që të marrin menjëherë masat për të lehtësuar pasojat e rritjes së pakontrolluar të çmimit të karburanteve. Gjithashtu ka paralajmëruar se rritja e çmimit të karburanteve rrezikon të marri përmasat e një krizë të vërtetë energjetike dhe do të sjellë pasoja të pallogaritshme për vendin. Nga ana tjetër edhe ekspertët kanë bërë thirrje për kontroll pasi çmimet po bëhen me të papërballueshme për konsumatorët.
Ndërkohë nga AK nuk kemi ende një reagim zyrtar por kujtojmë se çfarë ka ndodhur në vitin 2020 , ku Autoriteti i Konkurrencës ka hapur disa hetime për tregun e naftës dhe në asnjë nga vendimet që mori nuk vendosi asnjë sanksion për çmimet oligopol që mbizotërojnë në tregjet me pakicë në vendin tonë. Hetimet e bëra disa herë nuk sollën asnjë ndryshim dhe Autoriteti i Konkurrencës nuk vendosi asnjë sanksion real për shkelësit e ligjit të konkurrencës, oligopolin dhe tregun e naftës.
Hetimi i tregut të ngarkim shkarkimit të hidrokarbureve i bërë në vitin 2020
AK vendosi hapjen e procedurës së hetimit paraprak në “Tregun e ngarkim-shkarkimit, importit, depozitimit, shitjes me shumicë të karburanteve”, për të parë nëse ka, ose jo, shenja të kufizimit të konkurrencës. Hetimi paraprak do të përfshijë periudhën Janar 2017 – Tetor 2020.
Importi, depozitimi dhe ngarkim-shkarkimi i karburanteve realizohet nëpërmjet tre koncensioneve, në Gjirin e Vlorës dhe në zonën Porto Romanos, Durrës. Këto porte janë ndërtuar dhe funksionojnë mbi bazën e marrëveshjeve të koncesionit.
Tre ndërmarrjet janë La Petrolifera Italo-Albanese në portin Vlora-1, si edhe shoqëritë Romano Port dhe Port MBM, në zonën e Porto Romanos.
Koncesioni u ka dhënë kompanive të drejta ekskluzive dhe të veçanta nëpërmjet kontratave. Për Portin MBM, Komisioni i Konkurrencës është shprehur me vendimin nr. 383, datë 17.11.2015 “Për disa rekomandime lidhur me kontratën e koncesionit…”
Porti Vlora-1 i është dhënë me koncesion ndërmarrjes La Petrolifera Italo Rumena SPA sipas marrëveshjes për ndërtimin dhe shfrytëzimin e terminalit bregdetar për depozitimin e naftës dhe të nënprodukteve të saj.
Porti “Porto Romano” i është dhënë me koncesion firmës Romano Port SHA, më 2004, për ndërtimin dhe shfrytëzimin e pontilit të naftës, gazit dhe nënprodukteve të tyre të anijeve nën 20 mijë ton. Më 2015, është miratuar kontrata e koncesionit Porti MBM që ka të drejtën ekskluzive për përdorimin e portit duke e vendosur atë në pozita monopol për ofrimin e shërbimit të ngarkim-shkarkimit të mjeteve lundruese që transportojnë hidrokarbure të madhësive mbi 20.000 ton.
Në vitin 2012, kompania Romano Port sh.a u gjobit me 6.7 milionë lekë për abuzim me pozitën dominuese të ndërmarrjes në tregun e ngarkim-shkarkimit të gazit të lëngshëm të naftës në rrugë detare.
Vetëkuptohet se një gjobë e tillë për një kompani që ka ekskluzivitetin e shkarkimit të naftës në Durrës, nuk janë asgjë 6.7 milionë lekë. Të shohim se çfarë do të nxjerrë në dritë hetimi i ri që ka nisur këto ditë AK.
Kujtojmë se edhe disa ditë më parë Autoriteti i Konkurrencës vendosi me tre vota pro dhe dy kundër, që të mos i gjobiste ndërmarrjet që merren me shitjen dhe tregtimin e miellit.
Rritja e çmimit të bukës ka sjellë shqetësim të madh tek qytetarët, ndërsa pronarët e furrave të bukës kanë theksuar se ky vendim vjen pasi kompanitë e miellit kanë rritur çmimin. Në lidhje me këtë konstatim të bërë nga qytetarët, Autoriteti Kombëtar i Konkurrencës ka votuar kundër gjobitjes së kompanive që kanë rritur çmimet.
A po e bën punën e vetë Autoriteti i Konkurrencës? Në krah të kujt është sepse në krah të qytetarëve nuk po e shohim?
