Teksa ende nuk ka nje version zyrtar nga Policia e Shtetit për fatin e Ervis Martinajt, kryeministri Rama në bashkëbisedimin online me qytetarët dhe gazetarët ka folur edhe në lidhje me këtë çështje.
Para disa ditësh kryeministri i kërkoi policisë së shtetit të dilte me një deklaratë lidhur me misterin që mbulon zhdukjen e Ervis Martinajt prej 11 gushtit.
Ndërsa sot Rama tha se përgjigjia nga Policia e Shteit po vonohet pasi duhet të mbështetet në prova.
Gjithashtu Rama u shpre se nëse përgjigjia mbi fatin e Martinajt do të ishte gjetur dhe mbajtur e fshehtë, do të dilte për 9 ditë.
“Nëse përgjigjja do të ishte aty dhe do të ishte mbajtur e fshehur do të dilte për 9 ditë, por besoj se duhet të keni pak më shumë durim për të marrë një përgjigje përfundimtare dhe unë jam besimplotë që do ta kemi shumë shpejt. Sepse përgjigjja e Policisë së Shtetit duhet të jetë një përgjigje që duhet të mbështetet dhe në prova, nuk është thjesht një përgjigje të cilën pak a shumë e kemi që sot, por s’mund të thuhet zyrtarisht sepse kërkon të jetë e provuar”, ka deklaruar Rama.
Vlen të theksojmë se në media deri më tani kanë dalë dy versione kryesore. Një pjesë e gazetarëve të kronikës raportojnë duke iu referuar një videoje që ata thonë se e kanë parë, se Ervis Martinaj është kapur nga kundërshtarët e tij dhe është ekzekutuar. Ndërkohë, versioni tjetër lidhet me një skenar në lidhje me zhdukjen e tij me qëllim shmangien nga policia e cila e kishte shpallur në kërkim, por edhe prej kundërshtarëve pas vrasjeve të fundit në rrethin e tij shoqëror.
