Ditën e sotme u bë publik lajmi se në vendin tonë do të mbërrijnë së shpejti vaksinat kineze, ndërsa më herët kanë mbërritur edhe vaksinat ruse të Sputnik V. Por pse ky ndryshim i papritur në qëndrimin për vaksinat ruse e kineze kur më parë ishte deklaruar që nuk do të pranoheshin? Për këtë ka folur edhe Eugena Tomini e cila ka qenë e ftuar në “Open”, ku ka thënë se gjatë muajit shkurt pati rritje të rasteve, prandaj u panë mundësi të tjera veç vaksinave perëndimore.
“Ndryshimi nuk është 180 gradë, se ishim fokusuar tek vaksinat e BE, siç ishin Pfizer dhe Moderna. Përpjekjet ishin që të vinin sa më shpejt. Por numri i rasteve filloi të ngrihej vrullshëm. Në shkurt patëm një rritje të kurbës. Dhe për këtë, komiteti i ekspertëve gjykuan edhe mundësinë për të hyrë edhe vaksina të tjera në vend. U bë një gjykim i mirë dhe prandaj vendosën të merreshin. Më 27 dhjetor filloi dhe vaksinimi në botë, ne ishim në tratativa për marrjen e Pfizer. Në fillim nuk kishim mendje për vaksinat nga Lindja, pasi kishim synim 500 mijë vaksina nga Pfizer. Por kurrë nuk është hequr mundësia për marrjen e vaksinave të tjera. Duke filluar që nga protokollet e vlerësimit, evoluimi përkundrejt një vaksinimi masiv të orienton drejt kanaleve të tjera të komunikimit. Për të ulur intensitetin e madh të infektimit, kërkuam dhe kanale të tjera“, ka thënë Tomini.
