Djali adoleshent i Zv.ministrit të Pushtetit Lokal në Kosovë, Bashkim Krasniqit, është sulmuar ditën e djeshme, gjatë rrugës për në shtëpi, nga i riu Përparim Dugova.
Përparim Dugova e akuzoi 16-vjeçarin se i kishte ngacmuar të dashurën dhe pastaj u përlesh me të me grushte e thikë.
Si pasojë e përleshjes, 16-vjeçari mori dëmtime të lehta në trup, por theu edhe dorën.
Ndërkohë policia e Kosovës prangosi tre persona, ndërsa ngjarja u mbyll pasi ndërhynë kalimtarët e rastit.
V.K. kishte insistuar se vajzën e kishte vetëm shoqe, por Përparimi nuk e kishte besuar mesa duket.
Pasi e kishte kërcënuar adoleshentin kur po kthehej nga shkolla, ai e kishte vazhduar konfliktin duke tentuar edhe të hyjë në shtëpinë e zëvendësministrit.
Ndërkohë, zëvendës ministri Krasniqi duke folur për Gazetën Express ka zbuluar detaje të tjera të rastit, duke treguar edhe versionin e tij.
“Djemtë janë të moshës 15 dhe 16-vjeçare. Ngjarja ka ndodhur gjatë kohës kur unë isha në punë. Sulmuesi e ka sulmuar djalin tim me çykë të thikës. Me të parë rastin, disa komshinj kanë ndërhyrë për t’i ndarë pjesëmarrësit në incident” – tha ai.
“Sulmuesi njihet si djalë problematik. Arsyeja e sulmuesit ishte shumë banale. Rasti ka ndodhur kështu: pasi djali im me disa shokë dhe shoqe janë kthyer në shtëpi nga shkolla, sulmuesi e ka sulmuar djalin tim me arsyetimin se ky i ka ngacmuar të dashurën edhe pse djali im e ka mohuar një gjë të tillë duke i treguar se e ka shoqe të shkollës. Edhe pas ndërhyrjes së komshinjve, sulmuesi ka tentuar përsëri që konfiliktin ta vazhdojë në shtëpinë time. Si rezultat i incidentit djali im ka dorën e thyer dhe ka dëmtime në qafë”-shtoi më tej ai.
