Polici Nevaldo Haderaj dhe kolegët e patrullës nuk kishin kamera trupi në momentin e incidentit ku u vra i riu Klodian Rasha.
Ky fakt është dëshmuar nga shefi i patrullës së Përgjithshme pranë sektorit të Forcës së Posaçme “Shqiponja”, në Drejtorinë Vendore të policisë Tiranë, cili është pyetur nga prokurori i cështjes. Ai ka dëshmuar për thirrjen në radio të dy policëve që kërkonin mbështetje.
“Ju sqaroj se kamerat e trupit që policët kanë patur në pajisje , u janë dëmtuar dhe janë dorëzuar në magazine e DV Policisë Tiranë. Nuk e mbaj mend orën e saktë, pas orës së ngjarjes, kam urdhëruar patrullën e policisë “Shigjeta 5”, motociklistët (.. ), (.. ), (.. ), dhe (.. ), që të kontrollonin itinerarin e ndjekjes së personit nga punonjësit e policisë, për evidentimin e ndonjë sendi të kundraligjshëm. Pas disa minutash punonjësi i policisë (.. ), më njofton me telefon se kishin gjetur një armë zjarri, tip pistoletë , në rrugë, në afërsi të Drejtorisë së Doganave. Menjëherë kam raportuar eprorët . Më pas aty ka mbërritur grupi hetimor , ndërsa unë jam paraqitur në Drejtorinë e Policisë në lidhje me sigurimin e punonjësve të policisë (.. ), dhe (.. ),. Edhe patrulla e policisë “Shigjeta 5” , në fjalë nuk kanë patur kamera individuale trupi për mungesë të tyre”, ka deklaruar ndër të tjera oficeri i policisë.
Njeriu që i ka lënë pa kamera është ministri Sandër Lleshaj, eprori që duhet të zbatonte protokollin e shërbimit të Shqiponjave është Drejtori Ardi Veliu, ndërsa SHCBA e drejtuar nga Muhamet Rrumbullaku nuk e ka ngritur asnjëherë këtë problem në raportet e tij.
I zënë në gabim, Lleshaj deklaron pas incidentit, se “ngjarja është zbardhur se funksionojnë kamerat e biznesit”. Në fakt puna e policisë nuk mund të varet nga kamerat e biznesit. Funksioni i kamerave në trup të policisë është që të fiksojë ngjarje apo veprime që duhen dokumentuar.
Në vend që të siguronte kamerat për punën e policisë, sidomos të patrullave Shqiponja, ministri bënte tendera për kamerat e kompanisë së Ministrisë së Brendshme “Illyria Guard”, të cilat do t’i merrte me qira në prill 2020.
Tenderi
Janë 2 milionë euro që janë shpenzuar për këtë qëllim. Prioritet i Lleshajt ishte ky tender, jo pajisja e efektivëve me mjetet e punës. Sipas administratorit zyrtar të “Illyrian Guard”, ministër Sandër Lleshaj; kjo polici ka hapur tenderin me vlerë 197 milionë e 772 mijë lekë të reja pa TVSH, ose 2 milionë Euro me TVSH.
Tenderi është me këtë objekt: Marrje me qira operacionale “leasing”, sisteme alarmi e kamera vëzhgimi për objektet për 4 vite afat. Kur dihet se objektet shtetërore që ruan kjo kompani ishin të gjitha të pajisura me kamera, Lleshaj shkon dhe bën këtë shpenzim të pavend.
Historia e abuzimeve
Abuzimet me kamerat kanë historik të gjatë, qysh në nisje të programit për pajisjen e policëve me kamerat trupore.
Kontrolli i Lartë i Shtetit në vitin 2017 ka bërë kallëzim penal për 7 punonjës të Policisë së Shtetit për abuzimet në tenderin e blerjeve të kamerave të trupit të efektivëve të policisë. Për shkeljet e gjetura, KLSH ka paraqitur pranë Prokurorit të Përgjithshëm kallëzim penal për 4 punonjës të Policisë së Shtetit që kanë hartuar referencat e tenderit, si dhe për 3 anëtarë të Komisionit të Vlerësimit të Ofertave për kamerat e trupit.
Kontrolli i Lartë i Shtetit ka konstatuar se kamerat e trupit të efektivëve të policisë janë blerë 7 herë më të shtrenjta se çmimi i tregut vendas dhe të huaj. Vlera e tenderit ishte 541 milionë lekë, kurse dëmi i shkaktuar buxhetit kap vlerën e 189 milionë lekëve. KLSH thotë se tenderi u klasifikua qëllimisht “sekret” për të shmangur konkurrencën. Konkluzionet e auditit u bënë publike në raportin e Kontrollit të Lartë të Shtetit për Policinë e Shtetit për periudhën 2014-2016.
Rama dhe Tahiri për kamerat
Ky projekt i kamerave nisi në 2016 nga ministri i atëhershëm i Brendshëm, Saimir Tahiri. Policët me kamer në trup, Rama do ta quante “transformim epokal, transparencë e plotë”.
Në fakt, pre e këtyre kamerave ranë vetëm qytetarët që nuk dinin gjë dhe vazhduan të jepnin ndonjë 10 mijë lekëshe policit që i ndalonte. Madje, në prezantimin këtyre kamerave do të hidhej ideja edhe për blerjen e kamerave inteligjente që bëjnë identifikimin biometrik të kriminelëve të kërkuar. Nuk ka kaloi shumë kohë dhe projekti i transparencës dhe anti-korrupsionit në radhët e uniformave blu do të harrohej.
/GazetaReforma.com/
