Mëngjesin e sotëm presidenti Ilir Meta firmosi “live” anulimin e zgjedhjeve të 30 qershorit. Pas konferencë të jashtëzakonshme ka qenë Partia Socialiste, më saktë Elisa Spiropali ajo që ka thënë po para mediave se ditën e enjte do nisin edhe procedurat zyrtare për shkarkimin e presidentit Meta.
Presidenti i Republikës, Ilir Meta iu është përgjigjur me qetësi këtyre deklaratave të ardhura nga partia Socialiste ku bëhet fjalë për nisjen e procedurës për shkarkimin e tij.
Në një takim të zhvilluar me nxënës me rastin e 141-vjetorit të Lidhjes Shqiptare të Prizrenit, dhe 20-vjetorit të Clirimit të Kosovës, Meta ka ndarë edhe një mesazh për të gjithë.
“Të bëjmë të gjitha përpjekjet për të rritur shpresat dhe për t’i hapur perspektivat rinisë, për të ndërtuar të ardhmen në vendet tona. Lidhur me shqetësimin e tyre për zhvillimet në Shqipëri i garantova se Kushtetuta do të mbrohet deri në fund me qetësi dhe shqiptari.”-thotë presidenti.
Deklarata e plotë e Metës:
“Në këtë ditë të veçantë për kombin tonë, në 141-vjetorin e Lidhjes Shqiptare të Prizrenit dhe në prag të kremtimit të 20-vjetorit të çlirimit të Kosovës, pata kënaqësinë e veçantë të zhvilloja një takim të ngrohtë e vëllazëror me një grup studentësh e profesorësh nga të gjitha trevat shqiptare, të Kolegjit Universitar AAB në Prishtinë.
I lumtur të ndanim qëndrimin se rinia duhet të jetë promotore e proceseve demokratike dhe integruese në të dy vendet tona dhe se është shumë e rëndësishme që Shqipëria e Kosova të forcojnë bashkëpunimin në të gjitha fushat. Të bëjmë të gjitha përpjekjet për të rritur shpresat dhe për t’i hapur perspektivat rinisë, për të ndërtuar të ardhmen në vendet tona. Lidhur me shqetësimin e tyre për zhvillimet në Shqipëri i garantova se Kushtetuta do të mbrohet deri në fund me qetësi dhe shqiptari”.
