Pasditen e djeshme përpara Kryeministrisë u zhvillua një protesë kundër rritjes alarmante të çmimeve në vend, ku duket se më shumë se si pasojë e luftës Ukrainë-Rusi, është ajo e abuzimit. Konkretisht qytetarët me pankarta në duar protestuan kundër rritjes së “çmendur” të çmimit të karburantit.
Por policia ka arrestuar 16 persona në lidhje me protestën e zhvilluar dje përpara kryeministrisë në Tiranë. Personat e arrestuar akuzohen për veprat penale “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Mosbindja ndaj urdhrit të punonjësit të policisë së rendit publik” dhe “Pengimi i qarkullimit të mjeteve të transportit”.
Po ashtu janë proceduar 5 persona, të cilët do të hetohen në gjendje të lirë.
Theksojmë se pavarësisht këtyre arrestimeve, dhe shoqërimeve të dhunshme gjatë ditës së djeshme nga policia, qytetarët kanë paralajmëruar se protesta do të jetë e përditshme, në të njëjtën orë, 17:00, derisa qeveria të reflektojë ndaj kërkesave për uljen e çmimeve, përmes heqjes së disa prej taksave që rëndojnë mbi karburantet në Shqipëri.
Njoftimi i policisë së shtetit:
Bënë thirrje për grumbullime, bllokuan rrugët dhe kundërshtuan punonjësit e Policisë gjatë protestës së ditës së djeshme, arrestohen në flagrancë 16 shtetas dhe procedohen penalisht 5 shtetas të tjerë.
Strukturat hetimore të Drejtorisë Vendore të Policisë Tiranë dhe të Komisariateve në varësi të saj, nën drejtimin e Prokurorisë së Rrethit Gjyqësor Tiranë, në përfundim të veprimeve të para hetimore të kryera në lidhje me protestën e zhvilluar në datën 9 mars 2022, bazuar në provat e grumbulluara, arrestuan për veprat penale “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Mosbindja ndaj urdhrit të punonjësit të policisë së rendit publik” dhe “Pengimi i qarkullimit të mjeteve të transportit”, kryer në bashkëpunim, shtetasit:
- Ç., 21 vjeç, A. Z., 22 vjeç, V. P., 23 vjeç, E. K., 27 vjeç, Gj. P., 22 vjeç, S. Rr., 33 vjeç, P. S., 22 vjeç, E. N., 22 vjeç, E. L., 25 vjeç, M. D., 43 vjeç, A. M., 32 vjeç, A. N., 23 vjeç, E. A., 20 vjeç, Sh. M., 25 vjeç, Xh. L., 25 vjeç, dhe B. L., 28 vjeç.
Në vijim të veprimeve u proceduan penalisht shtetasit: E. H., 20 vjeç, E. P., 23 vjeç, A. A., 36 vjeç, M. K., 20 vjeç, dhe E. V., 22 vjeç.
Strukturat hetimore të Drejtorisë Vendore të Policisë Tiranë, nën drejtimin e Prokurorisë, vijojnë punën për identifikimin dhe kapjen e personave të tjerë të përfshirë në akte të kundërligjshme gjatë protesës së datës 9 mars 2022.
Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale.
Drejtoria Vendore e Policisë Tiranë apelon për të gjithë qytetarët që të mos përfshihen në akte dhune dhe të mos bllokojnë lëvizjen e lirë të mjeteve dhe qytetarëve sepse do të përballen me forcën e ligjit.
