Masat e marra nga autoritetet pas ngjarjes në Potam për mjetet lundruese ka sjellë protesta të shumta të pronarëve të këtyre mjeteve të cilët janë shprehur se po iu bllokohen mjetet pa të drejtë dhe se po iu frenohet e vetmja mundësi e fitimit të të ardhurave.Protestat filluan në Vlorë 2 ditë më parë, dje u ngrit dhe Shëngjini, ndërsa sot iu është bashkuar edhe Dhërmiu. Pronarët shprehen se 3 ditë më parë, mjetet e tyre janë marrë gjatë natës, pa asnjë lloj njoftimi, ndërkohë që disa prej tyre janë dëmtuar.
Ata akuzojnë edhe për selektime në tolerime të disa mjeteve, ndërsa shprehen se kjo situatë duhet të zgjidhet sa më parë. Sipas tyre, disponojnë lishenca dhe çdo gjë tjetër në mënyrë të rregullt, por ky lloj bllokimi po i shkakton një dëm tejet të madh ekonomik duke bërë që mos të arrijnë dot të paguajnë kreditë e marra për blerjen e mjeteve.
Një prej tyre shprehet se mjetet janë marrë në mënyrë të fshehtë raporton Balkanweb
“I kanë tërhequr, i kanë shqyer. Kanë bërë çfarë u ka dashur qejfi në mënyrë të paligjshme. Na i kanë prishur mjetet, na kanë vjedhur sende personale. Do hapim një padi, i ke me prova. Po bëjnë zgjedhje selektive”, pohon ai.
Pronarët e mjeteve kërkojnë zgjidhjen e kësaj situate sa më parë, në të kundërt do të përshkallëzojnë protestën e tyre.
