Mëngjesin e sotëm forcat policie dhe një fadromë kanë shkuar pranë zonës së Bregut të Lumit për të prishur shtëpitë e banorëve për të filluar zbatimin e projektit të “Unazës së re”.
Mirëpo efektivët blu janë përplasur me banorët e shtëpive që do të prishen, të cilët tashmë kanë pasur edhe përplasjen e tyre të parë serioze prej nga banorët kanë qëlluar me gurë dhe shkopinj në drejtim të policisë.
Një banore ka shkuar deri aty sa ka thënë se do t’i vrisnin efektivët që ishin aty, pasi as nuk i kanë matur shtëpitë.
“Këta janë kriminela, a e dini do t’i vrasim moj, do ti vrasim? Nuk na kanë ardhur për ta matur shtëpinë fare. I vraftë zoti, si do ja bëjmë”.
Ndërkohë që një tjetër banor ka thënë se kjo është protestë e depolitizuar, ata nuk duan as PD e as LSI, duan vetëm që shtëpitë e tyre të mos shkatërrohen, por edhe po u prishën të mund të dëmshpërblehen.
“ A keni shtëpi more? A keni fëmijë more? Ju kemi vëllezër more. Shihni si kanë dalë gra e fëmijë? Po edhe kriminelë të ishit more, edhe serbe? Po ju jeni të gjithë burra familjarë. S’dua t’ja di për asnjë parti, kam dalë të mbroj shtëpinë. S’më duhet as PD as LSI. Po keni fuqi, na vrisni e na shkelni.”-u shpreh njëri prej tyre.
Ndërkohë që tjetër banor është shprehur me fjalët:
“Ti të hash dhe të më biesh mua. Kjo është policia e Ramës, policia e Shtetit, për 5 banorë. Ça shteti është ky? Shtet leshi, u çua Enveri për herë të dytë”-tha ai.
