Para dy ditësh në selinë e PD-së u mbajt një protestë e thirrur nga Sali Berisha. Protesta ku demokratët lënduan demokratët ka vënë në lëvizje prokurorinë e Tiranës. Sapo është bërë me dije se ish-kryeministri Sali Berisha dhe Lulzim Basha do të thirren nga institucioni i drejtësisë për të dëshmuar në lidhje me protestën e dhunshme të 8 janarit përpara selisë së PD-së.
Kujtojmë se protesta e cila u mbajt ditën e shtunë në selinë e PD-së ishte e dhunshme, ku nuk mungoi përdorimi i mjeteve të forta dhe gazit lotsjellës. Protesta regjistroi shumë të plagosur, ndërsa pas ndihmës që Basha i kërkoi Ramës, ndërhyri dhe policia, e cila shpërndau turmën duke përdorur gaz lotsjellës. Lidhur me protestën e 8 janarit, policia ka arrestuar 34 persona, teksa 18 të tjerë janë në hetim. Mosha e të prangosurve varion nga 19 vjeç deri në 52 vjeç.
Policia nuk nguroi, ndërsa përdori dhunë ndaj protestuesve, teksa edhe ‘çunat me kapuça’ të Bashës, nuk kursyen karriget ndaj mbështetësve të Berishës. Mbi ta rëndojnë akuzat “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Pengimi i qarkullimit të mjeteve të transporti”,”Shkatërrimi i pronës” dhe “Prodhim, mbajtje, blerje apo shitje e armëve të ftohta”. Ndërkohë sot, raportohet se Prokuroria e Tiranës do të marrë në pyetje Sali Berishën dhe Lulzim Bashën në lidhje me të gjitha zhvillimet e ndodhura në selinë blu më datë 8 janar.
