Ka nisur një protestë kundër kryetarit të Bashkisë së Tiranës, Erion Veliaj, ku aktori i njohur Mehdi Malkaj u bëri thirrje të fuqishme pensionistëve për të ngritur zërin e tyre.
Në fjalën e tij, Malkaj kritikoi qeverinë për mënyrën se si po shpërndahen bonuset, duke pretenduar se fondet vijnë nga xhepat e pensionistëve.
“Po ju bëj thirrje, o zotërinj, nuk po jep kryeministri paratë nga xhepi i tij. Ne, pensionistët, nuk duhet të lodhemi duke protestuar, derisa të kemi jetën,” deklaroi ai.
Aktori foli gjithashtu për përfshirjen e tij në çështjet publike, duke theksuar se kundërshtimi i padrejtësive është një detyrim qytetar. “Më thonë se jam deformuar sepse merrem me politikë. Unë nuk merrem me politikë, por do të bëja gabim të mos merresha. Po nuk e bëmë ne, do ta bëjnë batakçinjtë me ne, siç po bëjnë,” tha Malkaj.
Protesta ka sjellë një frymë të re mobilizimi në radhët e pensionistëve, të cilët janë të vendosur të kërkojnë të drejtat e tyre.
