Në fjalën e tij gjatë tubimit qytetar, ish-kryeministri Sali Berisha theksoi rëndësinë e protestës së nesërme para Kuvendit, pas investigimit të RAI3 që e cilësoi Shqipërinë si një narko-shtet. Ai deklaroi se kjo protestë është një revoltë për Shqipërinë, duke përmendur se “Eurostat e ka faktuar se në 10 vite Shqipëria ka humbur 1 milion banorë, dhe se për të tretin vit radhazi në Shqipëri ka më shumë vdekje se lindje.”
Berisha fajësoi kryeministrin Edi Rama për këtë situatë dhe i bëri thirrje qytetarëve të bashkohen në protestë për të larguar regjimin që, sipas tij, ka shkatërruar vendin. Ai shtoi: “E vërteta është se vendi ynë, i bekuar me pasuri, klimë dhe begati, po vdes.”
Duke përmendur faktet e emigrimit dhe rënien e popullsisë, Berisha theksoi se “një komb nuk jeton dot nëse qeveriset nga narkoshteti.” Ai bëri thirrje për bashkim para parlamentit nesër në ora 10:00, duke theksuar se kjo protestë nuk është për një individ apo parti, por për Shqipërinë: “Kjo protestë është protestë revoltë për Shqipërinë. Nëse Shqipëria do të kishte gojë, sot ajo do ulërinte për ndihmë.”
Në fund, Berisha kërkoi mobilizimin e të gjithë shqiptarëve: “O sot o kurrë! Para parlamentit. Të gjithë bashkë. Ora 10:00.”
