Policia bën arrestime në Korçë pas protestës së zhvilluar nga të rinjtë për vrasjen e Klodian Rashës. Efektivët kanë shoqëruar organizatorët e protestës, kryetaren e FRPD-së në Korçë po ashtu dhe disa të rinj, pjesë të kësaj partie.
Gjithashtu janë shoqëruar në komisariat dhe disa qytetarë të cilët nuk kanë qenë pjesë e protestës.
Disa të rinj kanë goditur me shishe dhe gurë drejt policëve në Drejtorinë e Policisë në Korçë.
Mësohet se ka mbetur një efektiv i plagosur nga gurët e qëlluar drejt tyre.
Protestë ka pasur edhe në Lezhë, ku sot pasdite, dhjetra qytetarë, pjesa më e madhe e të cilëve të rinj, protestuan për vrasjen nga efektivi i policisë të 25-vjeçarit Klodian Rasha në Tiranë. Protestuesit u grumbulluan pranë obeliskut të Besëlidhjes rreth orës 17:00 të së enjtes dhe pasi ndezën qirinj në përkujtim të të ndjerit, me thirrje “Rama Ik”,”Drejtësi për Klodin” dhe “Polici e Krimit”, marshuan përgjatë rrugës “Luigj Gurakuqi” drejt Komisariatit të Policisë.
Aty ndaluan për disa minuta, duke ndezur qirinj e hedhur shashka e sende të forta në drejtim të godinës së Policisë. Më pas ndalesa e rradhës e protestuesve ishte Prokuroria e Rrethit Gjyqësor Lezhë. Aty rrëzuan derën e institucionit dhe thyen xhamat e vend-qëndrimit të rojës. Pas këtyre veprimeve protestuesit u rikthyen sërish para ambjeteve të policisë ku morën disa kosha mbetjesh dhe i vendosën në hyrjen e këtij institucioni, ndërsa thyen edhe një nga xhamat e dritares të një nga zyrave të Komisariatit të Policisë.
/GazetaReforma.com/
