Kreu i Partisë së Lirisë Ilir Meta në një dalje për mediat ka komentuar protestën e 2 ditëve më parë në Himarë, ku qytetarë, njerëz të politikës shqiptare dhe greke dolën në mbështetje të Fredi Belierit. Ky i fundit u zgjodh kryetar bashkie i Himarës, por ndodhet në burg pasi akuzohet për shit-blerje votash.
Meta tha se Beleri është i burgosur politik i kryeministrit dhe e cilësoi rast tipik të drejtësisë me regji dhe që tregoi sipas tij, funksionimin e shtetit si një juntë.
“Nuk kam asnjë koment për protestën sepse protestat në një vend demokratik duhet të jenë të përditshme. Por kam një qëndrim shumë të qartë për rastin Beleri, i cili është i burgosur politik i kryeministrit aktual. Provat nuk kanë munguar. Rasti Beleri është rasti i shembjes së shtetit të së drejtës në vendin tonë. Qëllimi i arrestimit ka qenë një, bllokimi i tij fizik me qëllim humbjen e bashkisë së Himarës dhe së dyti dhe qëndrimi që u mbajt ndaj tij është demonstrim i mosekzistencës së shtetit ligjor. Kjo bëhet në mënyrë që atij t’i pamundësohet betimi pas fitores që ai realizoi edhe si i ndaluar nga policia”, tha Meta.
Sipas tij, qëllimi kryesor ka qenë i qartë, që të vazhdojë tjetërsimi i pronave i banorëve të bashkisë së Himarës që kishte qenë premtim i z.Beleri.
