Policia e Shtetit ka njoftuar se do të marrë masa të rrepta për të siguruar që protesta e nesërme pranë Bashkisë së Tiranës të zhvillohet në mënyrë të qetë dhe pa incidente. Protesta, e cila kërkon dorëheqjen e kryebashkiakut Erion Veliaj për shkak të aferës “5D”, do të nisë në ora 10:00.
Për të garantuar sigurinë dhe rrjedhën e qarkullimit, nga ora 9:30 e mëngjesit të nesërm, qarkullimi i mjeteve në bulevardin kryesor pranë bashkisë do të ndalohet përkohësisht. Policia sugjeron që gjatë kësaj kohe të përdoren rrugë alternative si Unaza e Mesme dhe Unaza e Madhe për të shmangur bllokime të mundshme.
Policia ka bërë thirrje të gjithë protestuesve të qëndrojnë paqësorë dhe të shmangin çdo lloj veprimi që mund të çojë në dhunë. Njoftimi i policisë kujton gjithashtu se protestat e mëparshme kanë patur momente tensioni, ku janë hedhur objekte ndaj forcave të policisë dhe bashkisë. Autoritetet shprehen të vendosura për të mbrojtur të drejtën e qytetarëve për të protestuar, por kërkojnë nga pjesëmarrësit respektimin e ligjit dhe rendit publik.
