Nënkryetari i Partisë Demokratike (PD), Luçiano Boçi, ka zbuluar detaje në lidhje me protestën e planifikuar nga opozita më 11 korrik para Kryeministrisë, duke e cilësuar si një formë presioni për lirimin e ish-kryetarit të PD-së, Sali Berisha. Boçi bëri këto deklarata gjatë një interviste në emisionin “Open” në News24.
Boçi u pyet nëse PD po përdorej për çështjet personale të Berishës me drejtësinë. “Jo, nuk po përdoret,” tha ai, duke theksuar se çështja personale konsiderohet ajo e shpalljes non grata dhe jo procesi politik që po zhvillohet ndaj kryetarit të PD. “Aq më tepër që nuk ka as fakte, është një hetim i stisur dhe masa e marrë nuk është në proporcion me hetimin apo me rastet analoge për mënyrën si vepron drejtësia,” shtoi ai.
Sipas Boçit, forca politike kur përgatitet për zgjedhje, përgatitet me lidershipin e saj. “Ky reagim i yni është një reagim i demokratëve, ka qenë një kërkesë e përsëritur e demokratëve për kryetarin e opozitës,” theksoi ai.
Protesta e 11 korrikut pritet të jetë një demonstrim i mbështetjes për Berishën dhe një kritikë e ashpër ndaj veprimeve të qeverisë dhe sistemit të drejtësisë, të cilat opozita i konsideron si të padrejta dhe të motivuara politikisht.
