Teksa këtë të shtunë po mbahet protesta e thirrur nga opozita e bashkuar, Ambasada e Shteteve të Bashkuara të Amerikës në Tiranë iu bën thirrje shtetasve të saj që të tregojnë kujdes dhe të qëndrojnë larg protestës.
Përmes një postimi në rrjetet sociale ambasada e SHBA informon shtetasit e saj se ku do të mbahet protesta duke i paralajmëruar se situata mund të ndryshojnë shpejt dhe në mënyrë të paparashikueshme.
“Një protestë është planifikuar të zhvillohet në Bulevardin Dëshmorët e Kombit, përballë Kryeministrisë. Kjo protestë ka potencialin të përhapet në rrugët përreth duke shkaktuar bllokime të trafikut, devijime dhe mbyllje të rrugëve”, njofton ambasada e SHBA.
“Qytetarët amerikanë këshillohen të shmangin tubimet e mëdha. Ndërsa shumë ngjarje të mëdha zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme. Monitoroni mediat lokale dhe ndiqni udhëzimet e autoriteteve lokale të zbatimit të ligjit për informacionin më të fundit”, njofton ambasada.
Kujtojmë se kjo protestë është thirrur nga PD dhe PL pas publikimit të dosjes së ish-zyrtarit të lartë të FBI-së Charles McGonigal, ku përmendej kryeministri Edi Rama dhe ndër të thera thuhej se McGonigal ka marrë para nga shqiptarë pranë kryeministrit për të hapur hetime ndaj një lobisti të opozitës. Berisha e ka konsideruar një revolucion që do cojë në dorëheqjen e Ramës.
