Sot në orën 17:00, opozita do të zhvillojë protestën e saj kombëtare në kuadër të aksionit të mosbindjes civile, në Tiranë. Policia e Shtetit ka marrë masa të shtuara për ruajtjen e rendit dhe sigurisë gjatë protestës, me rreth 1,000 punonjës të policisë të dislokuar nëpër pika kyçe.
Siç bëri të ditur zëdhënësi i policisë, Çelmeta, masat janë marrë një orë përpara nisjes zyrtare të protestës. Forcat e rendit, Shqiponjat, FNSH dhe policia rrugore do të jenë të pranishme në të gjitha pikat ku mbështetësit e opozitës do të mblidhen. Po ashtu, Policia e Shtetit ka njoftuar se bllokimi i akseve rrugore gjatë protestës do të trajtohet si vepër penale, duke kujtuar se edhe në protestën e mëparshme, një ditë pas bllokimeve, u morën masa ligjore ndaj protestuesve dhe deputetëve të përfshirë.
Pikat e protestës dhe drejtuesit:
1. Bashkia – Deputetët: Edi Paloka, Dhurata Cupi, Lodovik Hasani, Tritan Shehu, Ina Zhupa.
2. Rrethrrotullimi Zogu i Zi – Deputetët: Oerd Bylykbashi, Albana Vokshi, Ferdinand Xhaferri, Andia Ulliri, Petrit Doda.
3. Rruga e Elbasanit, Ura te Xhamia – Deputetët: Flamur Noka, Tomorr Alizoti, Xhelal Mziu, Jozefina Topalli, Jorida Tabaku.
4. Sheshi Willson – Deputetët: Gazmend Bardhi, Bujar Leskaj, Luan Baci, Bledion Nallbati, Lefter Geshtenja.
5. Pallati me Shigjeta – Deputetët: Agron Gjekmarkaj, Elda Hoti, Kastriot Piroli, Lindita Metaliaj, Helidon Bushati.
Në këto pika, deputetë të ndryshëm të opozitës dhe figura të tjera të partive politike do të organizojnë tubime për të protestuar kundër qeverisë dhe kërkuar ndryshime politike.
Gjithashtu, policia e qarkut të Vlorës ka marrë masa të tjera sigurie në prag të protestës së opozitës që do të zhvillohet sot në Tiranë nga Partia Demokratike. Forcat e rendit janë dislokuar në hyrje të autostradës Levan-Vlorë për të kontrolluar makinat që udhëtojnë drejt kryeqytetit, në kuadër të organizimit të partive opozitare.
Kontrollet janë të fokusuar në identifikimin dhe sekuestrimin e sendeve të paligjshme që mund të përdoren gjatë protestës. Po ashtu, drejtuesve të automjeteve u kërkohet dokumentacioni i nevojshëm, përfshirë lejen e drejtimit, dhe ata i nënshtrohen testeve të alkoolit për të siguruar rendin dhe sigurinë gjatë protestës.
