Protesta e sotme ka sjellë të arrestuar të tjerë dhe këtë herë ndër ta ka pasur edhe emra të rëndësishëm.
Prokuroria e Rrethit Gjyqësor Tiranë në bashkëpunim me Policinë e Tiranës ka vënë në pranga 6 shtetas të cilët i akuzon për veprime të dhunshme mbi institucionet Kushtetuese, mbi Policinë e për më tepër për shkatërrimin e pronës publike gjatë tubimit.
Videokamerat e vendosura me rezolucion të lartë janë ato që shërbejnë si provë kryesore për shoqërimin dhe arrestimin e personave. Pra veprimet që janë kryer në bazë të analizës së pamjeve filmime, raportet e shërbimeve, por edhe prova të tjera të mbledhura nga grupet e hetimit në vendngjarje.
Deri më tani janë 17 persona që ndiqen në gjendje të lirë dhe 6 të tjerë janë shpallur në kërkim, mirëpo një emër i rëndësishëm i Partisë Demokratike është në procedim penal dhe bëhet fjalë për Sekretarin e Përgjithshëm të partisë, Gazmend Bardhi, i cili mban edhe titullin si organizator proteste.
Pjesë nga njoftimi i Policisë
Janë arrestuar për konsumimin e elementëve të veprave penale “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetësisë publike” shtetasit:
– J.Gj., 24 vjeç, nga Shijaku;
– M.D., 24 vjeç, nga Mamurrasi;
– A.K., 20 vjeç, nga Rrësheni;
– B.D., 36 vjeç, nga Kavaja;
– E.M., 26 vjeç, nga Kavaja;
– D.P., 31 vjeç, nga Tirana.
Po punohet për identifikimin, kapjen dhe vënien para përgjegjësisë ligjore të personave të tjerë që kanë kryer veprime të dhunshme gjatë protestës së djeshme.
Materialet proceduriale do t’i referohen Prokurorisë së Rrethit Gjyqësor Tiranë, për veprime të mëtejshme.
