Protesta e ditës së sotme ka zënë një vëmendje të madhe jo vetëm në median shqiptare, por edhe atë të huaj. Shumë gazeta dhe televizione prestigjioze kanë trajtuar temën e protestës së thirrur nga opozita para Parlamentit për të rrëzuar kryeministrin Rama.
Prestigjiozja italiane TG2, kronikën e protestës e nis me fjalët “Një manifestim kaq i madh, thuhet se nuk është parë që nga rënia e regjimit të diktatorit Enver Hoxha, në vitin 1991″.
Një pohim i fortë ky duke marrë parasysh që protestat e vitit 91’ ka qenë për rrëzimin e një regjimi. Megjithatë një tjetër pjesë e rëndësishme është edhe intervista që gazetari i TG2 i ka bërë një protestuesi, ku ky i fundit flet për situatën e krijuar në vend duke e lidhur krimin me politikën.
Ndërkohë një media tjetër shkruan: “Mijëra protestues, mbështetës së opozitës shqiptare, rrethuan godinën e parlamentit për të kërkuar dorëheqjen e qeverisë, duke e akuzuar për korrupsion dhe lidhje me krimin e organizuar”, – ka thënë Daily Mail.
Ajo shton se qindra policë dhe tela me gjemba ishin vendosur për të mbrojtur Parlamentin nga protestuesit, ndërsa sesioni parlamentar i së enjtes u anulua.
“Deputetët e opozitës, pjesë e partisë së qendrës së djathtë të Lulzim Bashës , firmosën djegien e mandateve dhe kërkojnë zgjedhje të parakohshme. “Ne do të drejtojmë një proces paqësor dhe demokratik për të rikthyer legjitimitetin dhe demokracinë në Shqipëri”,”- shkruan kjo e përditshmja britanike duke cituar edhe deklaratën e kryedemokratit Basha.
Mirëpo nuk ka mbetur pas edhe raportimi i gazetës gjermane Deutsche Welle, e cila ka përmendur masat e marra për mbarëvajtjen e saj si dhe duke përmendur thirrjet e bëra nga ndërkombëtarët që të shmanget dhuna.
“Shtatë kordonë me policë kanë rrethuar të (21.02.2019) Parlamentin për ta mbrojtur atë nga aktet e mundshme të dhunës, në protestën e dytë masive të paralajmëruar të opozitës. Thirrjet nga faktori ndërkombëtar për shmangien e akteve të dhunës dhe zhvillimin paqësor të protestës vijojnë edhe sot duke iu adresuar të gjitha palëve: organizatorëve, protestuesve dhe qeverisë”, – shkruan DW.
Edhe Zëri i Amerikës nuk ka qenë indiferent duke raportuar gjithë çfarë ka ndodhur.
“Është mbyllur pa incidente protesta e sotme e opozitës, e cila nisi para parlamentit, i rrethuar gjatë natës me tela me gjemba, ndërsa qindra forca policie ishin angazhuar pas informacione që policia tha se kishte “për organizimin e akteve të dhunshme, me synim hyrjen në sallën e parlamentit”. Seanca normale e së enjtes, ishte shtyrë me një vendim të kryetarit të Parlamentit Gramoz Ruçi. Gjë që sipas opozitës dëshmon se tanimë “parlamenti ka rënë”, – shkruan Zëri i Amerikës.
