Ashtu siç është paralajmëruar edhe më herët, sot do të mbahet protesta e opozitës para dyerve të Kuvendit, ndërsa 30 minuta më vonë pritet të nisë dhe seanca plenare.
Në këtë seancë të sotme pritet të vendoset mbi fatin e Sali Berishës, nëse do i hiqet mandati apo jo. Kujtojmë se SPAK ka kërkuar nga Parlamenti që Berishës t’i hiqet mandati pasi kërkohet arrestimi i tij për çështjen Partizani.
Ndërsa dje Gjykata Kushtetuese rrëzoi kërkesën e 30 deputetëve të opozitës për të cilësuar antikushtetuese masat ndaj Berishës, ndërsa ajo ia kaloi procedurën e radhës Kuvendit.
Pavarësisht ngjarjeve të njëpasnjëshme, ish-kryeministri Sali Berisha iu bëri thirrje qytetarëve që të jenë pjesë e protestës së opozitës.
Nën moton “O sot, o Kurrë”, Berisha theksoi se kjo protestë do të mbahet pasi qeveria Rama po ndërmerr vendime antikushtetuese, si dhe paralajmëroi se jo vetëm jashtë Parlamentit, por më datë 21 dhjetor do të vijojë edhe mosbindja civile e deputetëve brenda sallës se seancës plenare. Berisha paralajmëroi protesta edhe përpara SPAK.
