Ministrja e Arsimit Rinisë dhe Sporteve, Evis Kushi me anë të një video-mesazhi, ka reaguar në lidhej me protestën e maturantëve për testin e matematikës. Kushi ka njoftuar se MASR ka ngritur grupe pune të pavarura, me ekspertë të fushës së matematikës, mësues me përvojë dhe maturantë, të cilët kanë analizuar në detaje dhe vlerësuar me shumë vëmendje çdo pyetje në test, përputhshmërinë me programin, saktësinë shkencore dhe nivelin e vështirësisë.
Ministrja Kushi në përfundim të kësaj analize shprehet se, pavarësisht se maturantët në të gjithë vendin kanë qenë çdo ditë në shkolla, përveç 10 bashkive me risk të lartë, është vendosur që të ulet kufiri maksimal i pikëve për çdo notë.
“Nisur nga shqetësimet e maturantëve, mësuesve, prindërve, dhe pa dyshim duke konsideruar situatën e një viti jo normal e të vështirë të pandemisë, ku pavarësisht se maturantët në të gjithë vendin kanë qenë çdo ditë në mësim në shkollë, përveç 10 bashkive me risk të lartë ku për 6 javë mësimi u zhvillua online, kemi vendosur të plotësojmë kërkesën e maturantëve për të ulur kufirin minimal të pikëve për çdo notë”, ka thënë ministrja Kushi në video-mesazhin e përcjell.
Ministrja gjithashtu nënvizon se pas përfundimit të procesit të Maturës Shtetërore 2021, MASR do të bëjë një analizë të thellë, me qëllim identifikimin e të gjitha problematikave të mundshme dhe rishikimin e plotë të të gjithë procesit të maturës, akteve rregullatorë për këtë proces dhe administrimin e tij. Ajo u ka uruar të gjithë maturantëve shumë suksese në provimin me zgjedhje të ditës së nesërme!
