Këtë të hënë siç paralajmëruan të dielën, banorët e Bërxullës kanë zhvenodur protestën e tyre tek zyrat e Hipotekës, ku kërkojn një takim me drejtoreshën e këtij institucioni, Dallëndyshe Bicin. Një nga banorët i ka bërë thirrje drejtoreshës së Hipotekës, Dallëndyshe Bicit që të nxjerrë në terren një grup pune që të vlerësojë pronat e tyre, pasi sipas tij banorët e kësaj njësie po sorollaten nëpër institucione.
“Dallëndyshe Bici të ngrejë një grup që të dalë në terren dhe të bëjë matjet dhe certifikimin e pronave faktike. Sipas informimi tim populli i Berxullës vjen vërdallë sa nga një bashki në një tjetër apo në Këshillin e Qarkut. Kanë përplasje me AMPT-në.”, tha ai.
Ndërkohë një tjetër banor tha se këtë çështje do e ndjekë në SPAK, e deri në Strasburg.
“Nuk ka det e oqean që të lajë mëkatet e tyre ndaj nesh. Jam i mendimit se sot, nëse s’na jep përgjigje ajo (Bici) do i drejtohemi SPAK-ut, prokurorisë, deri në Strasburg. Në këmbë do nisem deri në Strasburg.”, tha ai.
Kujtojmë se prej muajsh tashmë banorët e Bërxullës janë në protestë ku kundërshtojnë projektin Thumanë-Kashar, i cili kalon mbi pronat e tyre. Banorët nuk janë kundër projektit, port kërkojnë një vlerësim me çmimin e tregut për pronat.
