Një zyrtar i lartë palestinez, i angazhuar në negociatat për armëpushimin mes Izraelit dhe Hamasit, ka konfirmuar për BBC-në se Egjipti dhe Katari kanë propozuar një plan të ri për të ndalur luftën në Gaza.
Ky propozim parashikon një armëpushim afatgjatë që mund të zgjasë nga pesë deri në shtatë vjet, me shkëmbimin e pengjeve izraelitë me të burgosur palestinezë, përfundimin zyrtar të konfliktit dhe tërheqjen e plotë të forcave izraelite nga Gaza.
Një delegacion i lartë i Hamasit, i udhëhequr nga drejtuesit politikë Mohammed Daruish dhe Khalil al-Hayya, do të udhëtojë në Kajro për të diskutuar më tej këtë iniciativë.
Propozimi vjen pas dështimit të marrëveshjes së mëparshme për armëpushim, e cila u ndërpre një muaj më parë pasi Izraeli rifilloi sulmet në Gaza, duke i fajësuar palët njëra-tjetrën për prishjen e marrëveshjes.
Në ndërkohë, situata në Gaza mbetet e tensionuar. Sipas një zyrtari të ministrisë së shëndetësisë së drejtuar nga Hamasi, deri tani 22 palestinezë janë vrarë dhe 45 të tjerë janë plagosur nga sulmet ajrore izraelite.
Sulmet kanë goditur zona të ndryshme si Khan Younis, Jabalia, Beit Lahia dhe qytetin e Gazës, duke shkaktuar shkatërrim të madh.
Këto zhvillime vijnë pas refuzimit nga Hamasi të një propozimi tjetër të Izraelit, që parashikonte çarmatimin e grupit në këmbim të një armëpushimi gjashtëjavor.
Kryeministri izraelit Benjamin Netanyahu ka deklaruar se do të vazhdojë ofensivën ushtarake derisa Hamasi të shkatërrohet dhe të gjithë pengjet izraelitë të kthehen në atdhe.
Nga ana tjetër, Hamasi ka theksuar se nuk do të lejojë lirimin e pengjeve pa një angazhim të qartë nga Izraeli për përfundimin e luftës.
