Historia e një biznesmeni shqiptaro-gjerman i cili bëri një investim luksoz në zonën mes Tiranës dhe Durrësit, nuk ka përfunduar edhe pse ai u gjend tragjikisht i vetëvrarë në shtëpinë e tij.
Sot është qëlluar me breshëri plumbash një kompleks luksoz në Maminas.
Kompleksi është në pronësi të Eugert Lazaj, i cili u vetëvra në një kompleks vilash në Farkë. Ngjarja ka ndodhur në orën 04.15 të mëngjesit të sotëm.
Vet ngjarja e vetëvrasjes së Lazajt, edhe pse u deklarua se ishte si shkak i depresionit për faj të koronavirusit, është e mbuluar ende nga misteri dhe e pazbardhur.
Tashmë kësaj ngjarjeje duket se i shtohet edhe dyshimi se dikush është orvatur për t’i marrë pronën Lazajt, ose e ka kërcënuar atë, nisur edhe nga ngjarja e sotme.
Policia e Durrësit deklaron zyrtarisht se, më datë 10.10.2020, rreth orës 04:05, në autostradën Tiranë-Durrës, në Maminas, është qëlluar me armë zjarri në drejtim të derës së jashtme të një objekti, në pronësi të shtetasit L.Z., duke shkaktuar vetëm dëme materiale.
Në ambientet e Policisë Durrës, janë shoqëruar disa shtetas të dyshuar për këtë ngjarje.
Grupi hetimor aktualisht po punon për zbardhjen e e plotë të ngjarjes, identifikimin dhe kapjen autorit/ve.
Historia e Eugert Lazajt
Burime nga policia e Durrësit, i thanë “GazetaReforma.com“, se paraprakisht dyshohet se, autorët janë të njëjtët që qëlluan me armë zjarri në servisin në Qafë-Kashar.
Eugert Lazaj u gjet i vdekur u dhe u shpall i vetëvrarë në shtëpinë e tij brenda një kompleksi shumë të njohur vilash në zonën e Farkës, më 30 korrik 2020. Biznesmeni u zbulua se u vra me armën e përdorur në masakrën në ish-bllok, pistoleta “Glock” e Redi Popescut, pronarit të “Monopol”. Por prokuroria ende po heton mbi ngjarjen, që besohet se është vetëvrasje, gjithsesi ende luan edhe alibia e një vrasje të kamufluar.
/GazetaReforma.com/
