Rreth tetë muaj pas vrasjes tronditëse të të miturit Martin Cani pranë shkollës “Fan Noli” në Tiranë, ngjarja ka marrë sërish vëmendje publike përmes publikimit të një videoje nga gazetari Eraldo Harlicaj.
Pamjet, të publikuara në 24 orët e fundit, kanë nxitur debat të gjerë dhe kanë ndarë opinionin publik në dy kampe.
Ndërkohë, në seancën e sotme për çështjen, kanë dëshmuar katër të mitur dhe dy të rritur që ndodheshin rastësisht në vendngjarje.
Gazetarja Anila Hoxha, në një analizë të ofruar në “Top Story”, ndau prapaskena nga biseda me Harlicajn pas publikimit të videos, por edhe detaje nga qëndrimi i Prokurorisë së Tiranës mbi këtë veprim.
“Precedenti i zbulimit të akteve dhe nisjes së hetimeve, kur një gazetar publikon të dhëna nga një dosje hetimore, është i rrezikshëm për mjedisin mediatik dhe punonjësit e mediave.
Nuk është fiks si rasti ‘Qyno’… Precedenti juridik është thuajse i ngjashëm, sepse dhe në rastin ‘Qyno’ gjykata pretendonte që mos të publikoheshin akte, Qyno i shkoi deri në fund, publikoi të dhëna dhe u kontrollua banesa e tij e pati më pas masa. Prokuroria shqiptare thotë që do hetojë se kush e nxori sekretin dhe nuk do hetojë atë që kishte për detyrë të ruante sekretin. Është shuma paradoksale. Kjo sjell frikësim të gazetarëve dhe është e pazakontë.
Do ndaj një moment, pasi u publikua video, Eraldo më telefonoi dhe ishte shumë i mërzitur. Më kërkoi një mendim dhe fjalia ishte: ‘A kam gabuar që e nxora?’. I thashë: ‘Ky është një vendim i yti personal dhe profesional, dhe vetëm ti e di çfarë po hulumton. Je duke ngritur pikëpyetje për një person tjetër që nuk ishte aty’. Gazetari e di se ku po e shtyn historinë.
Janë disa parime, respektimi i zisë. Duhet të ketë kujdes kur ka fëmijë etj. Kur është vrarë Klodian Rasha, ne publikuam videon, me një kujdes të jashtëzakonshëm u fshi çdo pamje dhe ne ishim të qartë çfarë po bënim. Reagimi ishte akuzues. Njerëz që shokoheshin, por ka shumë rëndësi qëllimi. Nuk besoj që Eraldo e ka publikuar videon për efektin ‘click-by’. Besoj se ka një qëllim në sensin e investigimit që po kryen”, u shpreh gazetarja Hoxha.
