Prokuroria e Tiranës ka përfunduar hetimet dhe ka çuar për gjykim dosjen ndaj ish-Presidentit të Urdhrit të Stomatologut, Nikoll Deda, dhe zv/presidentes Arta Gjoni, të akuzuar për shpërdorim të detyrës dhe vjedhje fondesh.
Procedimi penal nisi pas kallëzimit të bërë nga Almiro Gurakuqi, Presidenti aktual i Urdhrit të Stomatologut të Shqipërisë, i cili denoncoi përdorimin e parregullt të buxhetit të institucionit.
Sipas Prokurorisë, Nikoll Deda, në periudhën kur drejtonte Urdhrin, ka punësuar familjarë në pozicione kyçe për të ndikuar në vendimmarrjet e Këshillit Kombëtar, duke filluar që prej vitit 2016.
Ai akuzohet gjithashtu se ka keqpërdorur fondet e institucionit për përfitime personale, përmes pagesave fiktive dhe blerjes së biletave për udhëtime në emër të familjarëve të tij dhe personave të tjerë të afërt.
Prokuroria sqaron se edhe Arta Gjoni ka vepruar në kundërshtim me ligjin, duke marrë vendime financiare për buxhetin e vitit 2024 pa pasur kompetencat ligjore. Ajo është emëruar në detyrën e zv/presidentes në kundërshtim me një vendim të Gjykatës Administrative të Tiranës, e cila në vitin 2020 e kishte vendosur institucionin nën masë sigurimi.
Sipas të dhënave të hetimit, Gjoni ka autorizuar përdorimin e buxhetit të përkohshëm në mënyrë të njëanshme dhe jashtë kritereve ligjore, duke tejkaluar shpenzimet e lejuara dhe duke vepruar pa miratimin e organeve kompetente.
Të dy të pandehurit do të përballen me tre akuza penale:
• “Vjedhje duke shpërdoruar detyrën” (Neni 135),
• “Shpërdorim detyre” (Neni 248),
• “Veprime në kundërshtim me vendimin e gjykatës” (Neni 321).
