Ditën e sotme, menjëherë pas alarmit të ambasadores Yuri Kim e cila foli për Kadastrën e Durrësit, Prokuroria e Durrësit ka njoftuar se ka ngritur një grup pune dhe ka nisur hetimet për Kadastrën në të cilën analiza zbuloi se vetëm 15% e dosjeve në këtë institucion ishin të sakta. Hetimet do të kenë fokus punonjësit e këtyre zyrave që kanë shpërdoruar detyrën dhe kanë falsifikuar dokumente. Ende nuk ka emra, por parregullsi bëhet me dije se janë konstatuar në regjistrat e pasurive të paluajtshme të regjistruara në zonën bregdetare të Durrësit si Plazh, Spitallë, Lalëz, Draç e Rodon.
Njoftimi:
Nisur faktet e bëra publike në media për kontrollin e ushtruar në Kadastrën e Durrësit dhe konstatimin e dëmtimeve në regjistrat e pasurive të paluajtshme të regjistruara në zonën bregdetare të Durrësit si Plazh, Spitallë, Lalëz, Draç, Rodon, etj Prokuroria pranë Gjykatës së Shkallës së parë Durrës ka regjistruar procedimin penal nr. 582, datë 01.04.2022 për veprat penale të parashikuara nga nenet 186 e 248 te Kodit Penal. Me urdhër të drejtueses së prokurorisë është krijuar një grup hetimor i përbërë nga prokurore dhe oficerë të policisë gjyqësore për hetimin e plotë të çështjes.
Një ditë më parë ambasadorja e Shteteve të Bashkuara të Amerikës, Yuri Kim ngriti alarmin për çështjen në fjalë. Në një postim në rrjetet sociale, Kim bënte me dije se po priste që përgjegjësit të viheshin para drejtësisë. Sipas saj, duhet bërë më shumë transparencë lidhur me pronat në Shqipëri, pasi ndikon në thithjen e investimeve të huaja.
Drejtori i Përgjithshëm i Kadastrës Artan Lame tha dy ditë më parë se shkrirja e kadastrës së Durrësit dhe nisja e hetimeve të thelluara për abuzimet që janë bërë atje në 32 vite kanë nxjerrë një raport me shkeljet e detajuara që janë zhvilluar. Lame tha se nga të gjitha dosjet e marra nga kjo kadastër vetëm 15 % e tyre janë pa problem. Në pjesën tjetër mungojnë faqe, janë grisur ose dubluar duke bërë që një pasuri të dalë me dy ose më shumë pronarë.
