Prokuroria Themelore në Ferizaj ka kërkuar dënim me burg për të mitur ndaj një të riu të akuzuar për përfshirje në vrasjen e rreshterit të Policisë së Kosovës, Muhamed Lika, ngjarje e ndodhur në mbrëmjen e 1 prillit në Kaçanik.
Sipas aktakuzës, i mituri ka vepruar në bashkëpunim me pesë persona të tjerë, duke ndjekur viktimën deri në hyrjen e banesës dhe më pas ka qëlluar katër herë me armë zjarri të kalibrit 9.19 mm brenda pak sekondash.
Si pasojë e plagëve të marra, rreshteri Lika ka ndërruar jetë në vendngjarje. Vdekja e tij është konfirmuar nga raporti i autopsisë si pasojë e plagëve me armë zjarri.
I mituri, që ndodhet në paraburgim prej 21 prillit, akuzohet për “vrasje të rëndë në bashkëkryerje me dashje dhe përgatitje paraprake”.
Prokuroria nuk ka dhënë ende një version zyrtar mbi motivin e ngjarjes, por zyrtarë të Policisë së Kosovës kanë lënë të kuptohet më herët se dyshimet lidhen me detyrën e viktimës si efektiv policie.
Sipas Kodit të Drejtësisë për të Mitur në Kosovë, një i mitur mund të dënohet me burgim nëse është mbi 16 vjeç dhe ka kryer vepra penale që parashikojnë më shumë se pesë vjet burgim.
Dënimi për të miturit varion nga 6 muaj deri në maksimumi 10 vjet, në varësi të rrethanave dhe ashpërsisë së veprës.
Të gjithë gjashtë të dyshuarit në këtë rast ndodhen në paraburgim që prej fundit të muajit prill. Vrasja e rreshterit Lika tronditi opinionin publik dhe ngjalli reagime të forta nga institucionet e sigurisë në Kosovë.
