Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka përfunduar hetimet dhe ka dërguar në gjyq shtetasin Julian Morina, si dhe kompaninë “Xheluks Construksion” shpk, për veprën penale të ‘Ndërtimit të Paligjshëm’, sipas nenit 199/a/4 të Kodit Penal.
Gjatë hetimeve për disa procedime penale të regjistruara për Morinën dhe kompaninë që ai drejton, për periudhën 2021-2024, u konstatua se kjo shoqëri ka tejkaluar lejet e ndërtimit për disa projekte banimi dhe shërbimi.
Në veçanti, Prokuroria ka zbuluar se në zonën e Liqenit të Thatë, në Farkë, kompania “Xheluks Construksion” kishte marrë leje për ndërtimin e një objekti me 1 deri në 6 kate dhe 2-3 kate nën tokë, por ka shtuar një sipërfaqe ndërtimi dhe volum shtesë prej 2500 m², duke tejkaluar kështu lejen e miratuar.
Po ashtu, gjatë kontrollit në terren, është zbuluar një objekt tjetër i ndërtuar pa leje, me 7 kate dhe dy kate nën tokë, me një sipërfaqe totale prej 4622 m². Kjo kompani ka tejkaluar gjithashtu lejet e ndërtimit edhe në projekte të tjera në këtë zonë, duke krijuar një shtesë sipërfaqe prej 3065.8 m².
Gjithashtu, Prokuroria ka administruar një ekspertizë teknike për punimet e kryera nga kjo kompani në rrugën “Elbasanit”, ku është konfirmuar se një pjesë e këtyre punimeve kanë dalë jashtë lejes së miratuar. Në një objekt të ndërtuar për qëllime banimi dhe shërbimi, me 4-7 kate dhe dy kate parkimi, u regjistrua një shtesë ndërtimi prej 5866.88 m².
Në përfundim të hetimeve, Prokuroria ka vlerësuar se shtetasi Julian Morina duhet të përgjigjet para ligjit për ndërtimet e paligjshme dhe për tejkalimin e lejes së ndërtimit, me një sipërfaqe totale shtesë prej 15,974.88 m².
