Prokurori Arjan Muça ka kërkuar mbrojtje të posaçme pas shpërthimit të mjetit të tij me eksploziv ditën e djeshme në një parking. Ai i ka drejtuar kërkesë Komisionit të Posaçëm të mbrojtjes së prokurorëve në KLP ku thotë se për shkak të ngjarjes ndihet i kërcënuar dhe kërkon mbrojtje.
“I nderuar zoti Bazaj! Për shkak të ngjarjes së datës 11 mars 2021, në të cilën është vendosur një sasi eksplozivi mbi mjetin tim, ndihem i kërcënuar për vete dhe familjen time. Për këtë arsye kërkoj nga ana juaj miratimin e kërkesës për mbrojtje të posaçme”, shprehet Prokurori Muçaj.
Ngjarja ndodhi ditën e djeshme në parkingun e qendrës tregtare “Kristal” në Komunën e Parisit. Në makinë ishin vendosur 100 gram tritol, ndërsa janë sekuestruar edhe kamerat e sigurisë për të bërë të mundur kapjen e autorit.Prej dy vitesh prokurori e parkonte makinën në të njëjtin vend, që kur kishte filluar punë në KLP. Ai ka qenë OPGJ në hetimet e kryera për dosjen e Gërdecit, ndërsa bën raportet për gjyqtarët e prokurorët që kalojnë në procesin e Vettingut në KLP. Po ashtu bëshkëshortja e tij, Gentiana Muça është gjyqtare në Gjykatën Administrative të Tiranës dhe ende nuk dihet se për cilin prej tyre është drejtuar sulmi.
