Kryeministri Edi rama ka deklaruar se bonusi prej 500 euro për infermierët do të vazhdojë deri në fund të pandemisë.
Sot kryeministri zhvilloi konferencën e prezantimit të programit të Partisë Socialiste për Shëndetësisë. Në fjalën e tij, Rama tha se paga e mjekëve në tre vitet e fundit është rritur me 57%.
“ Një mjek sot merr 1100 dollarë në muaj pagë bruto”, tha ai.
Pjesë nga reagimi:
“1212 staf mbështetës kanë përfituar bonusin 500 euro, dhe ky do të vazhdojë deri në fund të luftës. Kemi punësuar personel shëndetësor plus, për të siguruar rritjen e kapaciteteve dhe burimet njerëzore të mos shterrin në asnjë rast.
Vetëm gjatë 3 viteve të fundit, paga e mjekëve dhe infermierëve është rritur me 57%. Dinjiteti është rivendosur në vend duke iu siguruar kushte të pakrahasueshme pune dhe punësim mbi bazë merite, të gjithë atyre që hyn rishtas në këtë trupë shërbëtorësh të parë të këtij vendi e populli.
Paga mesatare bruto e një mjeku sot është 1100 dollarë. Paga e një infermieri është 650 dollarë. Akoma nuk janë aq sa duhet, aq sa mjekët dhe infermierët meritojnë.
Ata që sot ju thonë se me ta shëndetësia fiton, nëse bëni atë që ju nuk do ta bëni, të votoni për ta, kishte mbyllur specializimet për 4 vite me radhë. Ne sot kemi mbi 1000 specializantë të rinj. Ne i dhamë fund historisë së punësimit të mjekëve dhe infermierëve me teser partie, me rryshfet apo krushqi”, tha Rama.
