Barjam Kanushi, një 35-vjeçar nga Saranda, është arrestuar pas dyshimeve se prodhonte dhe shiste vaj kanabisi, si dhe posedonte armë zjarri dhe armë të ftohta në banesën e tij.
Kanushi u kap në flagrancë duke transportuar vaj kanabisi me qëllim shitjen në qytetin e Sarandës.
Gjatë operacionit, u sekuestruan 3.5 litra vaj kanabisi, një armë kallashnikov, një thikë, fishekë dhe një sasi lëndë narkotike kanabis në formë çokollate.
Materialet hetimore janë referuar Prokurorisë së Shkallës së Parë Sarandë për veprime të mëtejshme.
Pjesë nga njoftimi:
Komisariati i Policisë Sarandë, bazuar në informacionet e siguruara në rrugë operative, se një shtetas po transportonte lëndë narkotike në aksin rrugor Delvinë-Sarandë, me qëllim shitjen e saj në qytetin e Sarandës, organizuan dhe finalizuan operacionin policor të koduar “Haze”.
Si rezultat i të cilit, u lokalizua dhe u arrestua në flagrancë shtetasi Barjam Kanushi, 35 vjeç, banues në Delvinë.
Gjatë kontrollit fizik dhe atij në banesë shërbimet e Policisë gjetën dhe sekuestruan 3.5 litër vaj kanabisi, 1 armë zjarri kallashnikov, një armë të ftohtë thikë, 3 krehëra, një sasi municioni luftarak, dhe një sasi kanabis sativa në formë çokollate.
Materialet hetimore iu referuan Prokurorisë pranë Gjykatës së Shkallës së Parë Sarandë, për veprime të mëtejshme procedurale.
