Faqja në TikTok e një të afërmi të autorit të dyshuar të vrasjes së 14-vjeçarit Martin Canaj është bllokuar nga autoritetet, ndërsa ka nisur një procedim penal ndaj tij. Komunikimi mes disa fëmijëve, ku përfshihet edhe kushëriri i autorit të dyshuar, ka nxjerrë në pah deklarata alarmante, duke treguar se ata jo vetëm që nuk e dënojnë aktin e rëndë, por edhe mbështesin autorin e vrasjes.
Një prej fëmijëve, që është kushëriri i autorit të dyshuar, ka komentuar ngjarjen dhe ka shprehur mbështetje për aktin, duke e quajtur atë një “shembull” dhe duke bërë thirrje për dhunë ndaj atyre që kritikojnë. Fëmija tjetër ka treguar se njihej virtualisht me autorin, pasi kishin qenë pjesë e një grupi online.
Specialistët e Sektorit për Hetimin e Krimeve Kibernetike të DVP Tiranë, menjëherë pas publikimit të pamjeve nga kjo komunikim, identifikuan shtetasin 16 vjeç që shfaqet në video, i cili është banues në SHBA. Pas verifikimeve, materialet janë referuar në Prokurorinë pranë Gjykatës së Shkallës së Parë të Tiranës për fillimin e procedimit penal.
Ky shtetas është akuzuar për veprën penale “Nxitja e urrejtjes ose grindjeve”, parashikuar nga neni 265 i Kodit Penal, pasi përmes rrjeteve sociale ka bërë thirrje për përdorimin e armëve të ftohta nga fëmijët dhe nxitjen e dhunës. Materialet procedurale janë dorëzuar në Prokurori për hetime të mëtejshme.
Ky rast ka tërhequr vëmendjen për përdorimin e rrjeteve sociale për të promovuar dhunë dhe urrejtje, duke theksuar nevojën për masa më të rrepta në kontrollin dhe ndalimin e këtyre aktiviteteve.
