Kolegji i Posaçëm i Apelit mori sot vendimin për shkarkimin e kreut të Gjykatës së Apelit Tiranë, Hysni Demiraj. Me anë të një njoftimi për mediat , KPA thotë se ka vendosur unanimisht të lërë në fuqi vendimin e Komisionit të Pavarur të Kualifikimit. Më tej shtohet se vendimi është marrë nga Arjana Hajdari, Ina Rama, Albana Shtylla, Luan Daci dhe Sokol Çomo.
Njoftimi i KPA-së
“Trupi gjykues i Kolegjit të Posaçëm të Apelimit, i përbërë nga Ardian Hajdari kryesues, Ina Rama relatore, Albana Shtylla, Luan Daci, Sokol Çomo, anëtarë, shpalli vendimin për çështjen (JR) nr.22/2019, datë 02.05.2019, që lidhet me ankimin e subjektit të rivlerësimit Hysni Demiraj, kundër vendimit nr. 108, datë 15.02.2019 të Komisionit të Pavarur të Kualifikimit.
Në përfundim të gjykimit në dhomë këshillimi, trupi gjykues, bazuar në nenin 66, pika 1, germa “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: Lënien në fuqi të vendimit nr. 108, datë 15.02.2019 të Komisionit të Pavarur të Kualifikimit, që i përket subjektit të rivlerësimit Hysni Demiraj. Ky vendim është përfundimtar dhe ka efekt të menjëhershëm”.
Hysni Demiraj që e ka nisur karrierën në vitet ’90’ del jashtë sistemit të drejtësisë, pas gati 30 vjet karrierë dhe shkaku kryesor lidhet me anët e errëta të pasurive të tij dhe marrëdhënieve të dyshimta financiare me persona të tretë.
Kreu i Gjykatës së Apelit Tiranë, Demiraj, u shkarkua nga Komisioni i Pavarur i Kualifikimit që në 15 shkurt 2019. Demiraj në seancat para KPK-së u përball me probleme të shumta në pasuri, me denoncime nga qytetarët dhe vendime të dhëna prej tij që kishin problematika. Ai nuk justifikoi dot as një boxh 5 milionë Lekë, që e kishte marrë nga një biznesmen.
