KPK ka vendosur sot kalimin me sukses të vettingut për gjyqtaren Flora Hajredinaj, në detyrë pranë Gjykatës së Posaçme kundër Korrupsionit dhe Krimit të Organizuar.
Harjedinaj ka qenë edhe anëtare e trupës gjykuese në procesin e ish-ministrit të Brendshëm, Saimir Tahiri.
Më 19 shtator 2019, ish-gjykata e Krimeve të Rënda i dha pafajësi Tahirit për akuzat e trafikimit të narkotikëve dhe grupit të strukturuar kriminal dhe e dënoi atë për veprën penale të shpërdorimit të detyrës. Trupi gjykues i përbërë nga gjyqtarët Ardit Mustafaj, Irena Gjoka dhe Flora Hajredinaj vendosën dënimin e Tahirit me 5 vjet burg dhe përfundimisht 3.4 vjet heqje lire për shkak të uljes së 1/3 nga gjykimi i shkurtuar. Gjithashtu, gjykata vendosi pezullimin e dënimit për tri vjet.
Procesi i vetingut për Hajredinajn u krye nga Brunilda Bekteshi kryesuese, Olsi Komici relator dhe Firdes Shuli anëtare. Në cilësinë e vëzhguesit ndërkombëtar ishte i pranishëm Gerrit Spregner.
Ndryshe nga Inspektoriati i Lartë i Deklarimit të Pasurisë dhe Konfliktit të Interesave, ILDKPKI që i ka konsideruar të sakta deklarimet e Hajredinajt. KPK identifikoi në seancën dëgjimore disa probleme në kriterin e pasurisë si dhe mungesë burimesh financiare.
Për një apartament me sipërfaqe 119.56 m2 të porositur në vitin 2006 për vlerën 81 mijë euro, gjyqtarja Hajredinaj ka deklaruar si burime krijimi një vlerë të dhuruar nga vjehrri në shumën 40 mijë euro; një kredi bankare në vlerën 4.8 milionë lekë dhe kursime bashkëshortore në shumën 1.6 milionë lekë.
/GazetaReforma.com/
