Është shkarkuar sot nga detyra një nga gjyqtarët që shpëtoi Dritan Dajtin nga burgimi i përjetshëm .
Aleks Nikolli, gjyqtar në Gjykatën e Apelit në Shkodër, është shkarkuar nga Komisioni i Pavarur i Kualifikimit pasi u konstatua mungesë burimesh të ligjshme dhe dyshime për veprime fiktive, pasi Nikolli kundërshtoi analizën financiare dhe kërkoi konfirmim.
Komisioni konstatoi pamundësi financiare për ndërtimin e një shtëpie trekatëshe në fshatin Ishull Shëngjin të Lezhës, ku gjyqtari Aleksi rezulton si pronar i katit të dytë me sipërfaqe 147.8 m2.
Nikolli ishte pjesë e pesëshes së gjyqtarëve që shpëtuan Dritan Dajtin nga burgimi i përjetshëm, bashkë me Fuat Vjerdhën Lindita Hoxha, Petrit Aliaj dhe Skënder Damini.
Në vitin 2019, u vu nën hetim për korrupsion nga ish-Prokuroria e Krimeve të Rënda, si një nga tre gjyqtarët që vendosi zbutjen e dënimit të Dritan Dajtit- i dënuar për vrasjen e 4 policëve që shkuan ta arrestonin.
Megjithatë, procesi i Vettingut për Aleks Nikollin u mbyll vetëm me kriterin e pasurisë.
Nikolli është diplomuar për drejtësi në Universitetin “Luigj Gurakuqi” në Shkodër dhe nga viti 2001 deri në vitin 2004 ai ka mbaruar studimet në shkollën e Magjistraturës.
Në vitin 2015, Nikolli ka marrë titullin “Doktor shkencash” në Universitetin Europian të Tiranës. Nga viti 2004 deri në vitin 2016 ka shërbyer si gjyqtar në Gjykatën e Rrethit Gjyqësor Shkodër dhe nga viti 2016 si gjyqtar në Gjykatën e Apelit Shkodër.
/BalkanWeb
