Presidenti i Republikës së Shqipërisë, Ilir Meta me anë të një postimi në rrjetet sociale, i ka uruar shërim të shpejt Papa Françeskut. Presidenti Meta shkruan se rikthimi i Atit të Shenjtë në krye të detyrës, është në të mirë të njerëzimit dhe të përhapjes së mesazheve hyjnore.
“U bashkohem lutjeve për suksesin e operacionit të planifikuar kirurgjikal të Atit të Shenjtë, me urimin e përzemërt për shërim të shpejtë dhe të plotë, si dhe për rikthimin sa më parë në krye të detyrës së Tij tepër të rëndësishme në të mirë të njerëzimit dhe përhapjes së mesazheve hyjnore”, ka shkruar në postimin e tij në rrjetet sociale, Presidenti i Republikës, Ilir Meta.
Kujtojmë ndër të tjera se pasditen e sotme, Papa Françesku u shtrua në një spital në Romë dhe do ti nënshtrohet një ndërhyrje kirurgjikale. Sipas një deklarate zyrtare nga selia e Shenjtë, ndërhyrja e Papës ishte e planifikuar dhe ka të bëjë me një “stenozë divertikulare simptomatike” të zorrës së trashë. Operacioni do të kryhet nga profesori Sergio Alfieri dhe pritet që në fund të ketë një deklaratë zyrtare për mediat lidhur me gjendjen e Atit të Shenjtë. Gjatë qëndrimit në spitalin “Gemelli”, Papa Francesco do të qëndrojë në kalin e dhjetë, në të njëjtat ambiente që janë strehuar dhe paraardhësit e tij në detyrë. Mësohet se, Papa ka marrë vetëm shoferin e tij dhe një bashkëpunëtor të ngushtë, duke mos tërhequr fare vëmendje. Madje për mbërritjen e tij në spital nuk kishte dijeni as një pjesë e madhe e stafit.
