Deputetët dhe kryebashkiakët socialistë që shoqërojnë kryeministrin Edi Rama në takimin e planifikuar me diasporën në Londër janë përballur me protesta nga disa shqiptarë.
Ata janë pritur nga Taulant Omi, një shqiptar i diasporës, i cili i ka vënë në siklet ata që po dilnin nga salla. Omi i ka pyetur ata, duke përdorur fjalë të forta, “O hajdutë, kush ua ka paguar paratë që keni ardhur deri këtu për të takuar Edi Ramën?”
Ai ka drejtuar pyetje të tilla edhe ndaj të pranishmëve si kryetari i Bashkisë së Koplikut, Tonin Marinaj, Pandeli Majko, dhe Alket Hyseni.
“A keni turp?” – ka vijuar ai, ndërsa i ka akuzuar për përdorimin e parave të dyshimta për udhëtimet e tyre.
Për të siguruar rendin gjatë këtij takimi, janë angazhuar rreth 30 policë britanikë dhe punonjës të një kompanie private sigurie.
Takimi i kryeministrit Edi Rama me shqiptarët në Londër është pjesë e turit të tij me diasporën dhe do të zhvillohet sot në orën 12:00 sipas orës lokale. Ky është një tjetër takim në kuadër të përpjekjeve për të angazhuar diasporën, ndërsa për herë të parë, zgjedhjet e vitit 2025 do të hapin mundësinë e votës për emigrantët.
