Prangosja e Blendi Tetës, si bashkëpunëtor në vrasjen e ish-policit, Santiago Malko, pritet të çojë në arrestime të tjera.
Siç shkruan “Shqiptarja.com”, hetuesit mendojnë se kemi të bëjmë me një skuadër prej 7 personash, që në Tiranë njihen si klani “Duka”.
Ky grup kriminal ka lindur së fundmi në Tiranë dhe po merr terren, në krahasim me bandat e vjetra.
Momentalisht, i vetmi që ndodhet në burg për vrasjen e ish-policit, është Blendi Teta.
Ai akuzohet për veprime që pengojnë në zbardhjen e të vërtetës.
Teta ka darkuar me L.D dhe D.A. vetëm pak orë përpara se të lëshohej urdhri për ekzekutimin e Malkos.
Personat e dyshuar nga policia, si të përfshirë në këtë ngjarje kriminale janë I.S., L.D.,E.D.,D.A.,O.L. dhe E.G.
Kujtojmë këtu se Malko ndodhej në makinën e tij tip “BMWX5”, kur u qëllua me breshëri kallashnikovi.
Më pas autorët u larguan me shpejtësi dhe dogjën njërin nga mjetet që u përdor për atentatin.
Nga këqyrja e kamerave në bizneset përreth, policia identifikoi Blendi Tetën, i cili ndodhej pranë vendit të krimit.
